|
หัวข้อ: ค่าวกึดเติงหาบ้าน เริ่มหัวข้อโดย: อัลิปรียา ที่ 01 สิงหาคม 2009, 02:01:PM ยกก๋อนวันทา ไหว้สาปี้น้อง วันนี้จะบ่ข้อง ใจกับไผหนา
อากาศดีน้อ จะได้อู่จ๋า ภาษาล้านนา มีมาก่อนนั่น บอกเล่าตั๋วต๋น ตัวเก่าไปอั้น ว่าจากบ้านมา เมินแล้ว จาวเมืองหมอกงาม ว่ายามคลาดแคล้ว จะบอกปี้แก้ว ยามไกล บ่หันหมอกนี้ เป๋นดีน้อยใจ๋ คิดถึงเมืองไพร หนักหนาเน้อเจ้า กึดเติงหาบ้าน กู้วันแสนเศร้า ค่ำเจ๊าคะนึง หนักนั้น ยามใดได้คืน สถานบ้านครั้น จะได้ไปป๊ะ เปื้อนนา สหายมิตรา หายหน้าหายลับ คงกลั้บมาพบเจอ ก่อนแลนายเหย หัวข้อ: Re: ค่าวกึดเติงหาบ้าน เริ่มหัวข้อโดย: สายชล ที่ 01 สิงหาคม 2009, 11:38:PM กึ๊ดเติงแต๊หนา กึ๊ดหาแต่บ้าน อยู่เวียงทำงาน อิ๊ดใจ๋แต๊นา เซ๊าะหาโอกาส ใครอู้ใคร่จ๋า บิดรมารดา ลูกใคร่อู้โตย ลูกขอแฮงใจ๋ โปรดส่งมาโจ้ย หื้อลูกหายอึ๊ด จากงาน ถ้ามีเวลา จะปิ๊กไปบ้าน จะไปกราบกราน แม่ป้อ ป้อแม่อยู่บ้าน ทำงานอิ๊ดก่ อิ๊ดนักก่ปอ พักก่อนเต๊อะหนา สุขภาพร่างก๋าย ขอหื้อฮักษา หื้อสุขกายา ค่ำเจ๊า ฝากบอกลุงป้า น้าอาโตยเจ้า ว่าลูกกึ๊ดเติง แต๊นา ว่างจากงานแล้ว จะปิ๊กไปหา คงได้ป๊ะหน้า ป้อแม่รอกำ ไม่เคยแต่งค่าวมาก่อน อยากลองแต่งดู ผิดพลาดประการใดก็ขออภัยด้วยนะค่ะ emo_47 |